Xəbərlər

“Aqrar Tədarük və Təchizat” ASC ilə “Araz” və “OBA” marketlər şəbəkəsi əməkdaşlığa başlayıb

23 / 09 / 2026

“Aqrar Tədarük və Təchizat” ASC ilə “Araz” və “OBA” marketlər şəbəkəsi arasında meyvə-tərəvəz məhsullarının tədarükünü əhatə edən əməkdaşlığa başlanılıb. Əsas məqsəd yerli fermerlərin məhsullarının daha geniş müştəri auditoriyasına çıxışını təmin etmək və onların bazarda əlçatanlığını artırmaqdır.

Əməkdaşlığın ilk mərhələsində Masallı rayonunda fəaliyyət göstərən fermerlər tərəfindən yetişdirilən yerli kartof məhsullarının tədarükü həyata keçirilib. Tədarük olunan məhsullar “Araz” və “OBA” marketlər şəbəkəsində satışa təqdim olunaraq istehlakçılara çatdırılıb.

Məhsulların fermerlərdən tədarükü “Aqrar Tədarük və Təchizat” ASC tərəfindən həyata keçirilib. Bu əməkdaşlıq yerli fermer təsərrüfatlarında istehsal olunan kənd təsərrüfatı məhsullarının müasir pərakəndə satış şəbəkələrinə çıxış imkanlarının genişləndirilməsinə, eyni zamanda yerli məhsulların istehlakçılara daha əlçatan şəkildə təqdim edilməsinə imkan yaradır.

Əməkdaşlığın davam etdirilməsi çərçivəsində digər yerli meyvə-tərəvəz məhsullarının da tədarük və satış prosesinə cəlb edilməsi nəzərdə tutulur. Bu istiqamətdə yerli istehsalçı və təchizatçılarla əməkdaşlığın genişləndirilməsi, müxtəlif çeşiddə və yüksək keyfiyyətli kənd təsərrüfatı məhsullarının  şəhər sakinlərinə təqdim olunması planlaşdırılır.