Xəbərlər
25-ci Yubiley Arıçılıq Məhsullarının Ənənəvi Respublika Sərgi-Satış Yarmarkası fəaliyyətə başlayır
17 / 10 / 2025
Kənd
Təsərrüfatı Nazirliyi və nazirliyin tabeliyində fəaliyyət göstərən “Aqrar Tədarük və Təchizat” ASC-nin birgə təşkilatçılığı,
Azərbaycan Arıçılar Assosiasiyasının tərəfdaşlığı ilə 18 oktyabr – 9 noyabr
tarixlərində 25-ci Yubiley Arıçılıq Məhsullarının Ənənəvi Respublika Sərgi-Satış
Yarmarkası fəaliyyətə başlayacaq.
Yarmarkada
bu il 43 regiondan 280-dən çox fermer iştirak edəcək. İştirakçılara yerlər fəaliyyət
göstərdikləri rayonların arıçı sayına uyğun olaraq proporsional qaydada ayrılacaq.
Onu da vurğulayaq ki, qeydiyyat prosesi 5–7 sentyabr tarixlərində
bal.kendden.az portalı üzərindən onlayn qaydada həyata
keçirilib.
Yarmarkaya yalnız Elektron Kənd Təsərrüfatı İnformasiya Sistemində 2025-ci il
sentyabrın 1-dək minimum 40 arı ailəsi ilə təsərrüfatını bəyan etmiş fermerlər
qəbul edilib. Və yarmarkada ümumilikdə 100 tondan çox bal və 15-dən artıq müxtəlif
növ arıçılıq məhsulu satışa çıxarılacaq.
Onu
da qeyd edək ki, satışa çıxarılan bütün məhsullar Azərbaycan Qida Təhlükəsizliyi
Agentliyi tərəfindən nümunə götürülərək laboratoriyada analiz olunub. Keyfiyyət
və qida təhlükəsizliyi standartlarına cavab verməyən məhsullar isə satışa
buraxılmayıb.
Yarmarkada
bu il bir sıra yeniliklər də tətbiq
olunacaq. Belə ki, “Aqrar Tədarük və Təchizat” ASC tərəfindən fermerlərə satış zamanı ödənişsiz qablaşdırma və brendləşmə dəstəyi göstəriləcək.
Beləliklə,
ənənəvi yarmarka hər gün saat 09:00-dan 19:00-dək Nərimanov rayonu, Fətəli xan
Xoyski küçəsi 5 ünvanında “Gənclik”
metro stansiyasının yaxınlığında fəaliyyət göstərəcək.