Новости

Xocalıda “Ballıcanının ilk AFAQ-çıları” tədbiri keçirildi

Oktyabrın 10-da Xocalı rayonunun Ballıca kəndində Aqrar Tədarük və Təchizat ASC-nin təşkilatçılığı və PAŞA Holdinqin maliyyə dəstəyi ilə AFAQ layihəsi çərçivəsində “Ballıcanının ilk AFAQ-çıları” adlı tədbir baş tutub. Tədbirin əsas məqsədi işğaldan azad olunan ərazilərdə kənd təsərrüfatının inkişafına dəstək göstərmək, xüsusilə də qadın fermerlərin bu sahədə fəallığını artırmaq və onların dayanıqlı təsərrüfatlar qurmasına şərait yaratmaqdır. Bu məqsədlə də tədbir çərçivəsində ümumilikdə 53 fermerə dəstək göstərilib.

Tədbirdə Azərbaycan Respublikası Prezidentinin Xankəndi, Ağdərə və Xocalı üzrə xüsusi nümayəndəliyinin Bərpa, Tikinti və İdarəetmə Xidmətinin direrktor müşaviri İmran Cümşüdov , Azərbaycan Respublikası Prezidentinin Xankəndi, Ağdərə və Xocalı üzrə xüsusi nümayəndəliyinin böyük məsləhətçisi Vüsal Səfərov, “Aqrar Tədarük və Təchizat” ASC-nin İdarə Heyətinin sədri Elgün Məhəmmədəlizadə, eləcə də kənd sakinləri iştirak ediblər.

Çıxış edən  “Aqrar Tədarük və Təchizat” ASC-nin İdarə Heyətinin sədri Elgün Məhəmmədəlizadə fermerlərə dəstək məqsədi daşıyan sosial yönümlü təşəbbüslər arasında AFAQ-ın xüsusi yer tutduğunu bildirib. O, layihə çərçivəsində bu günə qədər 312 qadına dəstəyin təmin olunduğunu və 2025-ci ildən etibarən isə qadın kooperativlərinin təsisinə dəstək göstərildiyindən də bəhs edib.

Tədbirdə çıxış edənlər vurğulayıblar ki, bu cür təşəbbüslər kənd yerlərində məşğulluğun artırılmasına, yerli istehsalın güclənməsinə və sosial rifahın yaxşılaşdırılmasına mühüm töhfə verir. Layihə çərçivəsində yaradılan imkanlar təkcə qadınların iqtisadi fəallığını artırmır, həm də kənd təsərrüfatında innovativ və dayanıqlı təsərrüfatçılığın inkişafına şərait yaradır.

Məhz bu məqsədlə Xocalıda hər birində 5 qadının yer aldığı “Güllü Yaylaq” və “Qızıl Pətək” kooperativləri təsis edilib. Bu kooperativlər kənd təsərrüfatı məhsullarının emalı və satışı ilə məşğul olacaq, nəticədə kənd qadınlarının həm məşğulluq, həm də gəlir imkanları genişlənəcək. Bu addım eyni zamanda regionda yerli istehsalın güclənməsinə və qadınların iqtisadi müstəqilliyinə mühüm dəstəkdir.

Xocalıya səfər çərçivəsində layihənin davamlı təsirini gücləndirmək üçün fermerlər üçün biznes idarəçiliyi, maliyyə savadlılığı, heyvandarlıq, arıçılıq, quşçuluq, tingçilik və kooperativ idarəçiliyi üzrə peşəkar təlimlər təşkil olunub. Təlimlərdə iştirakçılara yalnız nəzəri biliklər deyil, həm də praktik bacarıqlar ötürülüb.

Tədbirin yekununda fermerlərin təsərrüfatlarını inkişaf etdirmələrinə dəstək məqsədilə AFAQ layihəsi çərçivəsində 86 ədəd avadanlıq və 18 ton yem verilib, həmçinin onlara sertifikatlar təqdim edilib.