"Bir qarış torpaq da boş qalmamalıdır!" İlham Əliyev

headset

1652

Xəbərlər
Diplomatik korpus nümayəndələri “Şəhərdən Kəndə” layihəsi çərçivəsində “Sitrus vadisi” aqroturunda iştirak ediblər
schedule 16/12/2019

Kənd Təsərrüfatı Nazirliyinin tabeliyində olan “Aqrar Tədarük və Təchizat” ASC (ATT) və ABŞ-ın Beynəlxalq İnkişaf Agentliyinin (USAID) birgə təşkilatçılığı ilə “Şəhərdən Kəndə” layihəsi çərçivəsində “Sitrus vadisi” aqroturu təşkil olunub.

Lənkəran şəhərinin İstisu qəsəbəsində yerləşən “Citrus Valley” fermer təsərrüfatına təşkil olunmuş aqroturda Azərbaycanda akkreditə olunmuş diplomatik nümayəndəliklərin rəhbər şəxsləri, beynəlxalq təşkilatların, müvafiq dövlət və özəl qurumların nümayəndələri iştirak ediblər.

Aqroturun əsas məqsədi ölkəmizdə həyata keçirilən ilk aqroekoturizm layihəsi olan “Şəhərdən Kəndə” barədə xarici və yerli qonaqlara ətraflı məlumat vermək, onları yerli fermer təsərrüfatlarından biri ilə tanış etmək, eyni zamanda Lənkəran və Azərbaycanın digər regionlarında aqroekoturizmin inkişafına dəstək göstərmək olub.

Tədbiri giriş sözü ilə açan "Sitrus vadisi" təsərrüfatının sahibi fermer Rəftarə Şükürova aqrar fəaliyyəti barədə qonaqlara məlumat verib: “Təsərrüfat sahəm 15 hektar ərazini əhatə edir. Burada müxtəlif sitrus meyvələrinin yetişdirilməsi ilə məşğulam. Bir ildir ki, mən "Aqrar Tədarük və Təchizat" ASC ilə əməkdaşlıq edirəm. Bizim əməkdaşlığımız "Kənddən Şəhərə" layihəsi ilə başlayıb. İndi isə "Şəhərdən Kəndə" layihəsi çərçivəsində əməkdaşlıq edirik. İki aylıq əməkdaşlığımız çərçivəsində artıq 150-ə yaxın turisti qəbul etmişik. Gələcəkdə bu sayı daha da artırmaq istəyirik”.

Aqrotur çərçivəsində təşkil olunan tədbirdə çıxış edən Lənkəran Rayon İcra Hakimiyyətinin başçısının birinci müavini Möhübbət Babayev Lənkəran rayonunda aqrar sahədəki inkişafdan bəhs edib: “Lənkəran çay, çəltik və sitrus təsərrüfatları ilə hər zaman məşhur olub. Bu tədbirin baş tutduğu İstisu qəsəbəsi rayonda ilk çay fabrikinin tikildiyi qəsəbədir. Ölkə Prezidenti cənab İlham Əliyevin apardığı islahatlar nəticəsində biz Lənkəranda təsərrüfat sahələrini inkişaf etdirməyə davam edirik. Hal-hazırda Lənkəranda min hektardan artıq çəltik, 500 hektardan artıq isə çay becərilir”.

Kənd Təsərrüfatı nazirinin müavini Elçin Zeynalov isə çıxışında ölkədə aqrar sahədə aparılan islahatlar barədə məlumat verib: “Bu gün Azərbaycanda kiçik və orta sahibkarlığın inkişafına dövlət tərəfindən dəstək göstərilir. Aqrar sahədə islahatların aparılmasında məqsəd innovativ texnologiyaların tətbiqi ilə bağçılıq təsərrüfatlarında məhsuldarlığın artırılmasını təmin etməkdir. Ümid edirik ki, həyata keçirdiyimiz layihələr sayəsində aqrar turizmin inkişafı təmin olunacaq. Çalışacağıq ki, bir ildən sonra ölkəmizdə aqroturizmin daha böyük nəticələrini sizinlə bölüşək”.

Tədbirdə çıxış edən ABŞ-ın Beynəlxalq İnkişaf Agentliyinin (USAID) missiya direktoru Cey Sinqx aqroturizmin aqrobiznesin ən maraqlı sahələrindən biri olduğunu bildirib: “Azərbaycanda kənd təsərrüfatının inkişafına investisiyamız Rəftarə Şükürova kimi fermer və sahibkarların bu sahəyə dəstək göstətməyə hazır olduqları üçün uğurlu oldu. Aqroturizm və qida emalı, qadınlar və gənclər də daxil olmaqla müxtəlif sahibkarlar qrupunu aqrar sektora cəlb edə biləcək aqrobiznesin maraqlı sahələridir. Ümid edirik ki, onlar daha çox turisti ziyarət etməyə, yerli insanları burada qalmağa və Azərbaycanın gözəl bölgələrində yaşayışlarını qurmağa təşviq edə bilərlər. Qeyd edim ki, Aqroturizmi inkişaf etdirmək Kənd Təsərrüfatı Nazirliyinin tabeliyində olan Aqrar Tədarük və Təchizat ilə USAID arasında tərəfdaşlığın yeni sahələrindən biridir”.

“Aqrar Tədarük və Təchizat” ASC-nin İdarə Heyətinin sədri Leyla Məmmədova isə qeyd edib ki, ölkəmizdə aqroturizm üçün hər cür şərait mövcuddur: "Məqsədimiz fermerlərin məhsulların satışından asılılığını azaltmaqdır. Bu mənada aqroturizm ən yaxşı vasitələrdən biridir. Dünyanın çox ölkəsində bu praktika var.  Biz də yerli və xarici qurumlarn, eləcə də KİV nümayəndələrinin dəstəyi ilə bu layihəni daha da kütləvi hala gətirmək istəyirik”.

Tədbir çərçivəsində aqrotur iştirakçıları  “Yaşıl çay” MMC-yə məxsus çay plantasiyasına da səfər ediblər. Burada qonaqlara çay bitkisinin becərilmə qaydaları və emal prosesi barədə ətraflı məlumat verilib.

Xatırladaq ki, oxşar tur cari ilin 12 oktyabr tarixində “Aqrar Tədarük və Təchizat” ASC, Aqrar Kredit və İnkişaf Agentliyi və Birləşmiş Millətlər Təşkilatının İnkişaf Proqramınının birgə təşkilatçılığı ilə Hacıqabul rayonunda yerləşən nar təsərrüfatına da təşkil olunub.

Qeyd edək ki, “Şəhərdən Kəndə” layihəsi kiçik və orta fermer təsərrüfatlarını dəstəkləmək məqsədi ilə həyata keçirilir. Layihə fermer təsərrüfatı sahiblərinə təkcə məhsuldar dövrdə deyil, eləcə də qeyri-məhsuldar dövrdə əlavə gəlir qazanmaq imkanı verir. Layihə çərçivəsində mütəmadi olaraq hər həftəsonu Azərbaycanın müxtəlif regionlarında yerləşən təsərrüfatlara aqroekoturlar təşkil olunur. İştirakçılara alternativ istirahət imkanı verən turlar həm şəhər sakinləri, həm də xarici ölkə vətəndaşları tərəfindən maraqla qarşılanır. “Şəhərdən Kəndə” aqroturları turistlərin aqrar sahə üzrə bilik və bacarıqlarını artırmalarına, bir və ya bir neçə günlük kənd həyatı yaşamalarına imkan yaradır. 

“Aqrar Tədarük və Təchizat” ASC “Şəhərdən Kəndə” layihəsində iştirak etmək istəyən fermerlərlə əməkdaşlığa hər zaman açıqdır. Hal-hazırda qurum yerli fermerlərin müraciətlərini qəbul etməyə davam edir. Layihəyə qoşulmaq istəyən fermerlərə peşəkar mütəxəssislər tərəfindən təlimlər keçiriləcək. Mart ayına qədər layihədə iştirak edən fermer təsərrüfatlarında isə göstərilən xidmət səviyyəsinin yüksəldilməsi məqsədi ilə müəyyən təmir işləri aparılacaq.

Layihədə iştirak etmək istəyən fermerlər ATT-nin Regional İdarələrinə yaxınlaşa, +994504008899 nömrəsinə zəng edə və ya qurumun sosial media hesablarına yaza bilərlər.

Digər xəbərlər
schedule

12/02/2020

Kənd Təsərrüfatı Nazirliyinin tabeliyində “Aqrar Tədarük və Təchizat”...
schedule

03/02/2020

AFAQ layihəsi çərçivəsində Kənd Təsərrüfatı Nazirliyinin tabeliyində “...
schedule

30/01/2020

Afinada Yunanıstan Sahibkarlar Federasiyası, Yunanıstan Milli İnvestis...
schedule

23/01/2020

Kənd Təsərrüfatı Nazirliyinin tabeliyində "Aqrar Tədarük və Təchizat"...