Kənd Təsərrüfatı Nazirliyinin tabeliyindəki “Aqrar
Tədarük və Təchizat” ASC-nin kollektivi 8 Noyabr - Zəfər Günü münasibəti ilə İkinci
Fəxri xiyabanı ziyarət edib. Ölkəmizin ərazi bütövlüyü uğrunda canlarından
keçmiş qəhrəman şəhidlərimizin xatirəsi ehtiramla anılıb, məzarları üzərinə gül
dəstələri düzülüb.
Daha sonra “Aqrar Tədarük və Təchizat” ASC-də Zəfər
Gününə həsr olunan tədbir keçirilib. Tədbirdə Cəmiyyətin rəhbərliyi, Vətən
müharibəsində iştirak etmiş əməkdaşları və qazilər iştirak ediblər. Əvvəlcə Vətən
uğrunda canlarından keçmiş bütün şəhidlərimizin əziz xatirəsi bir dəqiqəlik
sükutla yad edilib və Azərbaycanın Dövlət Himni səslənib. Sonra Vətən müharibəsinə
həsr olunmuş qısa-metrajlı sənədli film nümayiş olunub.
Tədbirdə giriş nitqi ilə çıxış edən “Aqrar Tədarük
və Təchizat” ASC-nin İdarə Heyətinin sədri Aqil Quliyev Zəfər Günü münasibətilə
bütün tədbir iştirakçılarını təbrik edib. Vətən müharibəsində Cəmiyyətin əməkdaşlarının
da iştirak etməsinin kollektiv üçün iftixar və qürur mənbəyi olduğunu bildirib.
İdarə Heyətinin sədri vurğulayıb ki, Müzəffər Ali
Baş Komandan İlham Əliyevin rəhbərliyi ilə qısa müddətdə qazanılan şanlı qələbə
bütün dünyaya xalq-dövlət birliyinin gücünü, ordumuzun rəşadətini və xalqımızın
əzmkarlığını göstərib.
Cəmiyyətin sədri onu da qeyd edib ki, 44 günlük Vətən
müharibəsindən sonra işğaldan azad olunan ərazilərdə aparılan genişmiqyaslı
quruculuq işləri Azərbaycan dövlətinin gücünü bir daha bütün dünyaya nümayiş
etdirir.
Daha sonra söz Vətən müharibəsi iştirakçılarına və
qazilərə verilib. Çıxış edənlər tarixi bir qələbədə pay sahibi olduqları üçün
qürur duyduqlarını ifadə ediblər.
Sonda Cəmiyyətin Vətən müharibəsində iştirak edən əməkdaşlarına
Zəfər Gününün 1 illiyi ilə əlaqədar xatirə hədiyyələri təqdim olunub.